নতুন দিল্লী, ১১ ফেব্ৰুৱাৰী: অসম মুখ্যমন্ত্ৰী হিমন্ত বিশ্ব শৰ্মাৰ বিৰুদ্ধে ৰাজ্যখনৰ সংখ্যালঘু সম্প্ৰদায়ৰ বিৰুদ্ধে ঘৃণামূলক বক্তব্য দিয়াৰ অভিযোগত তৎকাল হস্তক্ষেপ বিচাৰি চাৰিজন বিশিষ্ট অসমীয়া ব্যক্তিয়ে সৰ্বোচ্চ ন্যায়ালয়ৰ দ্বাৰস্থ হৈছে।
আইনী সংবাদ মাধ্যম লাইভ ল’ অনুসৰি, এই আবেদনখন দাখিল কৰিছে অৱসৰপ্ৰাপ্ত অধ্যাপক তথা জনবুদ্ধিজীৱী ড° হীৰেন গোহাঁই, প্ৰাক্তন আৰক্ষী সঞ্চালক প্ৰধান হৰেকৃষ্ণ ডেকা, নর্থইষ্ট নাওৰ সম্পাদক-ইন-চীফ পৰেশ চন্দ্ৰ মালাকাৰ, আৰু জ্যেষ্ঠ অধিবক্তা শান্তনু বৰঠাকুৰে।
সংবিধানৰ ৩২ নম্বৰ অনুচ্ছেদৰ অধীনত দাখিল কৰা এই ৰিট আবেদনত অভিযোগ কৰা হৈছে যে মুখ্যমন্ত্ৰীগৰাকীয়ে বাৰে বাৰে বক্তব্য দি অসমত বঙালী-মূলৰ মুছলমান সম্প্ৰদায়ৰ বিৰুদ্ধে বৈষম্য, সামাজিক আৰু অৰ্থনৈতিক বয়কট আৰু হিংসাৰ উচটনি দিছে।
এই বিষয়টো মুখ্য ন্যায়াধীশ সূৰ্য কান্তৰ আগত উত্থাপন কৰি অধিবক্তা ৰূপালী ছেমুৱেলে তৎকাল শুনানিৰ অনুৰোধ জনায়। মুখ্য ন্যায়াধীশে একে ধৰণৰ পূৰ্বৰ আবেদনৰ সৈতে এই বিষয়টো শুনানিৰ বাবে তালিকাভুক্ত কৰিবলৈ সন্মতি জনায়।
আবেদনখনত কোৱা হৈছে যে ৰাজহুৱা ভাষণ, সংবাদমেল আৰু সামাজিক মাধ্যমৰ জৰিয়তে মুখ্যমন্ত্ৰীগৰাকীয়ে ধৰ্ম, ভাষা, জন্মস্থান আৰু বাসস্থানৰ আধাৰত বিদ্বেষ প্ৰচাৰ কৰিছে। লগতে ‘মিয়া’ আৰু ‘বাংলাদেশী’ শব্দ ব্যৱহাৰ কৰি বঙালী-মূলৰ মুছলমানসকলক অপমানসূচকভাৱে চিহ্নিত কৰা হৈছে বুলিও অভিযোগ কৰা হৈছে। আবেদনখনত সামাজিক আৰু অৰ্থনৈতিক বয়কট, ভূমি, বাহন আৰু জীৱিকাৰ সুযোগ অস্বীকাৰ কৰাৰ আহ্বান দিয়া মন্তব্যৰ কথাও উল্লেখ আছে।
আবেদনখনত ৭ ফেব্ৰুৱাৰীত বিজেপিৰ অসম প্ৰদেশ শাখাৰ সামাজিক মাধ্যম একাউণ্টত আপলোড কৰা **পিছত ডিলিট কৰা এটা ভিডিঅ’**ৰ কথাও উল্লেখ কৰা হৈছে। উক্ত ভিডিঅ’টোত মুখ্যমন্ত্ৰীগৰাকীক বন্দুক ধৰি ‘পইণ্ট ব্লেংক শ্বুট’ শব্দ ব্যৱহাৰ কৰি সংখ্যালঘু সম্প্ৰদায়ৰ পৰিচয় বহন কৰা দুজন এনিমেটেড ব্যক্তিক লক্ষ্য কৰি গুলী চালনা কৰা দৃশ্য দেখুওৱা হৈছিল বুলি অভিযোগ কৰা হৈছে। আবেদনকাৰীসকলৰ মতে, এই ভিডিঅ’টোৱে সমাজত বিদ্বেষ, ভয় আৰু আতংকৰ পৰিবেশ সৃষ্টি কৰিছে।
ইয়াৰ পূৰ্বে CPI(M) আৰু CPI-এও মুখ্যমন্ত্ৰীৰ বিৰুদ্ধে এফআইআৰ পঞ্জীয়ন আৰু আদালতৰ তত্ত্বাৱধানত বিশেষ তদন্ত দল (SIT) গঠনৰ দাবীত সৰ্বোচ্চ ন্যায়ালয়ত আবেদন দাখিল কৰিছিল।
