গুৱাহাটী: ২০২৬ চনৰ অসম বিধানসভা নিৰ্বাচনৰ পূৰ্বে বিভিন্ন অভিযোগ উত্থাপন কৰি অসম প্ৰদেশ কংগ্ৰেছ কমিটি (APCC)ৰ এটা প্ৰতিনিধি দলে ১৭ ফেব্ৰুৱাৰীত গুৱাহাটীত মুখ্য নিৰ্বাচনী আয়ুক্ত জ্ঞানেশ কুমাৰৰ সৈতে সাক্ষাৎ কৰে।

সাংসদ ৰকিবুল হুছেইন আৰু প্ৰাক্তন ৰাজ্যসভা সাংসদ ৰিপুন বৰাৰ নেতৃত্বত গঠিত এই প্ৰতিনিধি দলে নিৰ্বাচনী তালিকাৰ বিশেষ ঘনিষ্ঠ সংশোধন (SIR) প্ৰক্ৰিয়াৰ নামত সাধাৰণ নাগৰিকক হাৰাশাস্তি কৰা হৈছে বুলি অভিযোগ তোলে। APCC-ৰ অভিযোগ অনুসাৰে, অসম চৰকাৰৰ সহায়ত নিৰ্বাচন আয়োগৰ যন্ত্ৰপাতি অপব্যৱহাৰ কৰি বহু জীৱিত ভোটাৰৰ নাম মৃত বুলি চিহ্নিত কৰি ভোটাৰ তালিকাৰ পৰা বাদ দিয়া হৈছে।

ৰাজীৱ ভৱনত অনুষ্ঠিত এক সংবাদমেলত ৰিপুন বৰা আৰু ৰকিবুল হুছেইনে কয়, “APCC সভাপতি গৌৰৱ গগৈৰ নিৰ্দেশ অনুসৰি চাৰিজনীয়া এটা প্ৰতিনিধি দলে নিৰ্বাচন আয়োগক সাক্ষাৎ কৰি আমাৰ স্থিতি আৰু পৰামৰ্শসমূহ দাঙি ধৰি মুক্ত, ন্যায়সংগত আৰু স্বচ্ছ নিৰ্বাচন নিশ্চিত কৰাৰ আহ্বান জনাইছোঁ।” লগতে তেওঁলোকে বিজেপি চৰকাৰৰ অধীনত আইন-শৃংখলা পৰিস্থিতি উদ্বেগজনক বুলি মন্তব্য কৰে আৰু আৰক্ষী-প্ৰশাসনৰ অপব্যৱহাৰে নিৰ্বাচনী প্ৰক্ৰিয়াত বাধা সৃষ্টি কৰিব বুলি সকীয়াই দিয়ে।

সমগুৰি উপ-নিৰ্বাচনৰ উল্লেখ কৰি ৰিপুন বৰাই অভিযোগ তোলে যে সেই সময়ছোৱাত ভয়ৰ পৰিৱেশ সৃষ্টি কৰা হৈছিল। তেওঁ কয়, নিৰ্বাচনী প্ৰচাৰৰ পূৰ্বে, চলাকালীন আৰু পাছতো সাংসদ ৰকিবুল হুছেইনৰ ওপৰত একাধিকবাৰ আক্ৰমণ সংঘটিত হৈছিল, আনকি তেওঁৰ বাসগৃহত আক্রমণ কৰা হৈছিল। লগতে সাতজন বিধায়কৰ বাহন ভাঙচুৰ কৰা হৈছিল, যেতিয়া আদৰ্শ আচৰণ বিধি বলবৎ আছিল। এই সকলো অভিযোগ আৰু এফআইআৰ দাখিল কৰাৰ পাছতো প্ৰশাসনে কোনো ফলপ্ৰসূ ব্যৱস্থা গ্ৰহণ নকৰাৰ অভিযোগ কৰে বৰাই।

পঞ্চায়ত নিৰ্বাচনৰ সময়ত শোণিতপুৰ জিলাৰ নাদুৱাৰত কংগ্ৰেছ প্ৰাৰ্থীক মনোনয়ন পত্ৰ দাখিলত বাধা দিয়া হৈছিল বুলি অভিযোগ তোলে কংগ্ৰেছে। তদুপৰি সেই সময়ত জিলাৰ কংগ্ৰেছ সভাপতি ৰাজপথত আক্ৰমণৰ সন্মুখীন হৈছিল বুলিও তেওঁ উল্লেখ কৰে। গৌৰৱ গগৈৰ ৰাজ্যব্যাপী যাত্ৰাৰ সময়তো বিভিন্ন ঠাইত বিজেপি কৰ্মীয়ে কাৰ্যসূচীত বাধা প্ৰদান কৰা আৰু মন্দিৰ দৰ্শনত বাধা সৃষ্টি কৰা হৈছিল বুলি অভিযোগ কৰে বৰাই, যাৰ বিৰুদ্ধে আৰক্ষীয়ে কোনো ব্যৱস্থা নলওৱা বুলি কয়।

ৰিপুন বৰাই স্পষ্ট ভাষাত কয়, “যদি আৰক্ষীয়ে নিৰপেক্ষভাৱে কাম নকৰে, তেন্তে কেতিয়াও মুক্ত আৰু ন্যায়সংগত নিৰ্বাচন সম্ভৱ নহয়।” মুখ্য নিৰ্বাচনী আয়ুক্তই আশ্বাস দিয়ে যে নিৰ্বাচনী প্ৰক্ৰিয়া আৰম্ভ হোৱাৰ পিছত প্ৰশাসন সম্পূৰ্ণৰূপে নিৰ্বাচন আয়োগৰ নিয়ন্ত্ৰণত থাকিব আৰু এনে ঘটনাসমূহ ৰোধ কৰা হ’ব।

প্ৰতিনিধি দলটোৱে ৰাজনৈতিক দলসমূহে জনসভা আয়োজনৰ অনুমতি ল’বলৈ মাচুল আদায় কৰাৰ প্ৰথাকো গণতন্ত্ৰবিৰোধী বুলি অভিহিত কৰে। ৰিপুন বৰাই কয়, “সভা কৰিবলৈ যদি টকা দিবলগীয়া হয়, তেন্তে গণতন্ত্ৰ ক’ত থাকে? অনুমতি প্ৰক্ৰিয়াটো অত্যন্ত দীঘলীয়া আৰু হয়ৰানিমূলক — থানাৰ পৰা ডেপুটি কমিছনাৰ, তাৰপিছত আৰক্ষী অধীক্ষক আৰু পুনৰ ঘূৰি আহিবলগীয়া হয়। এইটো বিৰোধী দলক হাৰাশাস্তি কৰাৰ এক পদ্ধতি।” তেওঁ দাবী কৰে যে নিৰ্বাচনৰ সময়ত ২৪ ঘণ্টাৰ ভিতৰতে সভাৰ অনুমতি দিয়া উচিত।

SIR প্ৰক্ৰিয়াক লৈ চলি থকা হয়ৰানি আৰু মুখ্যমন্ত্ৰীৰ হস্তক্ষেপৰ অভিযোগো উত্থাপন কৰে প্ৰতিনিধি দলটোৱে।

সংবাদমেলত সাংসদ ৰকিবুল হুছেইনে কয়, “বিজেপিয়ে বিহুৰ আগতেই নিৰ্বাচন সমাপ্ত কৰিব বিচাৰে। নহ’লে বিহুৰ মঞ্চত অসমৰ মানুহে জুবিন গাৰ্গক স্মৰণ কৰিব।” তেওঁ মুখ্যমন্ত্ৰীয়ে জুবিন গাৰ্গক লৈ কৰা কিছুমান মন্তব্যক লৈও প্ৰশ্ন তোলে।

তেওঁ লগতে কয় যে মুখ্য নিৰ্বাচনী আয়ুক্তই আগতে দিল্লীত স্পষ্ট কৰি দিছিল যে অসমত SIR নহ’ব, কিয়নো NRC প্ৰক্ৰিয়াৰ সময়তেই নথিপত্ৰ পৰীক্ষা কৰা হৈছিল। “আমি সেই সিদ্ধান্তক আদৰণি জনাইছিলোঁ। কিন্তু মুখ্যমন্ত্ৰীয়ে দিল্লী ভ্ৰমণ কৰি অহাৰ দুদিনৰ ভিতৰতে আকৌ SIR আৰম্ভ কৰা হ’ল। কোনে চাপ প্ৰয়োগ কৰি এই বিশেষ ঘনিষ্ঠ সংশোধন আৰম্ভ কৰিলে?” — বুলি প্ৰশ্ন তোলে হুছেইনে।