গুৱাহাটী: আগন্তুক ২০২৬ চনৰ অসম বিধানসভা নিৰ্বাচনক লৈ ৰাইজৰ দলৰ সৈতে সম্ভাব্য নিৰ্বাচনী মিত্ৰতা সন্দৰ্ভত হোৱা আলোচনা সাময়িকভাৱে স্থগিত ৰাখিবলৈ কংগ্ৰেছে সিদ্ধান্ত লৈছে বুলি বুধবাৰে প্ৰকাশ কৰে অসম প্ৰদেশ কংগ্ৰেছ কমিটিৰ সভাপতি গৌৰৱ গগৈয়ে।
এটা বিবৃতিত গগৈয়ে কয় যে জনতাৰ আশা অনুসাৰে বিৰোধী দলসমূহে ঐক্যবদ্ধ কৌশলৰে নিৰ্বাচনত অৱতীৰ্ণ হওক বুলি ভাৱি কংগ্ৰেছে আৰম্ভণিতে ৰাইজৰ দলৰ সৈতে মিত্ৰতাৰ সম্ভাৱনা অন্বেষণ কৰিছিল। কিন্তু কেইবাটাও দফা আলোচনা হোৱা সত্ত্বেও আগবাঢ়িবলৈ অনুকূল পৰিৱেশ সৃষ্টি কৰিব নোৱাৰিলে দুয়োটা দলে।
তেওঁ কয় যে যিকোনো নিৰ্বাচনী মিত্ৰতাৰ মুখ্য লক্ষ্য হৈছে ব্যৱহাৰিক দিশসমূহ—বিশেষকৈ আসন জিকাৰ সম্ভাৱনা—সুনিশ্চিত কৰা। এই উদ্দেশ্যে কংগ্ৰেছে আলোচনা চলাকালত নমনীয় দৃষ্টিভংগী গ্ৰহণ কৰিছিল আৰু সম্ভাব্য আসন বণ্টনৰ বিষয়তো আলোচনা কৰিছিল।
“কিন্তু বিভিন্ন কাৰণত দুয়োটা দলে জনসাধাৰণে আশা কৰা ধৰণে মিত্ৰতা গঢ়ি তুলিবলৈ সক্ষম হোৱা নাই,” বুলি গগৈয়ে কয়। তেওঁ লগতে জনায় যে এতিয়া ৰাইজৰ দলৰ সৈতে হোৱা আলোচনা সাময়িকভাৱে স্থগিত ৰখা হৈছে, যদিও ভৱিষ্যতে পুনৰ এই সম্ভাৱনা পৰ্যালোচনা কৰা হ’ব পাৰে।
এই ঘটনাটো তেনে সময়তে ঘটিছে যেতিয়া ২০২৬ চনৰ বিধানসভা নিৰ্বাচনত বিজেপি নেতৃত্বাধীন শাসক মিত্ৰজোঁটৰ বিৰুদ্ধে প্ৰতিদ্বন্দ্বিতা কৰিবলৈ অসমৰ বিৰোধী দলসমূহে বৃহৎ মৈত্ৰী গঢ়াৰ বিভিন্ন বিকল্প অন্বেষণ কৰি আছে।
CAA-বিৰোধী আন্দোলনৰ পিছত সমাজকৰ্মী-ৰাজনীতিবিদ অখিল গগৈৰ উদ্যোগত গঠিত ৰাইজৰ দলে ৰাজ্যত মাটি অধিকাৰ, খিলঞ্জীয়া পৰিচয় আৰু সামাজিক ন্যায়ৰ দৰে বিষয়সমূহক আগবঢ়াই আঞ্চলিক ৰাজনৈতিক শক্তি হিচাপে আত্মপ্ৰকাশ কৰিছে।
আগন্তুক নিৰ্বাচনৰ পূৰ্বে বিৰোধী ঐক্য গঢ়াৰ প্ৰচেষ্টা বৃদ্ধি পাইছে যদিও আসন বণ্টন আৰু ৰাজনৈতিক কৌশল সম্পৰ্কীয় আলোচনাই এখন বৃহৎ বিৰোধী মঞ্চ গঢ়ি তোলাত এতিয়াও কিছু প্ৰত্যাহ্বান সৃষ্টি কৰি আছে।
