গুৱাহাটী, ২৪ ডিচেম্বৰঃ
অসমৰ কাৰ্বি আংলং আৰু পশ্চিম কাৰ্বি আংলং জিলাত চলি থকা অশান্তি লৈ কংগ্ৰেছ নেতা গৌৰৱ গগৈয়ে গভীৰ উদ্বেগ প্ৰকাশ কৰি ৰাজ্য চৰকাৰক বলপ্ৰয়োগৰ পৰিৱৰ্তে সংবেদনশীলতা আৰু সংলাপৰ জৰিয়তে পৰিস্থিতি সমাধান কৰাৰ আহ্বান জনাইছে।
বুধবাৰে সামাজিক মাধ্যম X-ত গগৈয়ে উল্লেখ কৰে যে প্ৰতিবাদকাৰীসকলে মুখ্যমন্ত্ৰী হিমন্ত বিশ্ব শর্মাৰ ঘনিষ্ঠ এজন বিজেপি নেতাৰ ঘৰত অগ্নিসংযোগ কৰিছে। লগতে তেওঁ কয় যে আৰক্ষীৰ গুলীচালনাত এজন প্ৰতিবাদকাৰীৰ মৃত্যু হোৱাৰ লগতে কেইবাজনো প্ৰতিবাদকাৰী আৰু আৰক্ষী কৰ্মী আহত হৈছে। দুয়োখন জিলাত এতিয়াও মোবাইল ইণ্টাৰনেট সেৱা বন্ধ কৰি ৰখা হৈছে।
গগৈয়ে কয়, “অসম প্ৰদেশ কংগ্ৰেছ দলে প্ৰতিবাদৰ নামত হিংসাক কোনোপধ্যেই সমৰ্থন নকৰে। আমি শান্তি বিচাৰো আৰু সকলোকে সংযম ৰক্ষা কৰিবলৈ আহ্বান জনাওঁ।” তেওঁ লগতে আশংকা প্ৰকাশ কৰে যে বৰ্তমানৰ শাসনৰ অধীনত স্থানীয় বাসিন্দা, আদিবাসী জনগোষ্ঠী, জাতি-গোষ্ঠী আৰু থলুৱা ৰাইজ উপেক্ষিত হোৱাৰ সম্ভাৱনা আছে।
এই সন্দৰ্ভত অসম আৰক্ষী সঞ্চালক প্ৰধান (DGP) হৰমীত সিঙে কয় যে হিংসাই কোনো সমস্যাৰ সমাধান নকৰে। তেওঁ জনায় যে এই অশান্তিত ৪৮ জন আৰক্ষী কৰ্মী আহত হৈছে। সিঙে লগতে উল্লেখ কৰে যে চৰকাৰে প্ৰতিবাদকাৰীৰ সৈতে আলোচনা চলাই আছে আৰু শীঘ্ৰে বৈঠক আয়োজন কৰাৰ পৰিকল্পনা কৰিছে।
DGP-য়ে কয় যে এজন নেতাৰ গ্ৰেপ্তাৰৰ ভুল খবৰ প্ৰচাৰ হোৱাৰ ফলতে পৰিস্থিতি অধিক উত্তপ্ত হৈ উঠে। প্ৰতিবাদকাৰীৰ একাংশই দলং দখল কৰাৰ চেষ্টা কৰাৰ লগতে কাঁচা বোমা, শিল, ধনুক-বাণেৰে আৰক্ষীক আক্ৰমণ কৰিছিল। এই ঘটনাসমূহৰ ভিডিঅ’ সংৰক্ষণ কৰি আইনী ব্যৱস্থা লোৱাৰ প্ৰক্ৰিয়া চলি আছে বুলি তেওঁ জনায়।
উল্লেখযোগ্য যে আইন-শৃংখলাৰ অৱনতি ঘটাৰ পাছতে মঙলবাৰে অসম চৰকাৰে কাৰ্বি আংলং আৰু পশ্চিম কাৰ্বি আংলং জিলাত ইণ্টাৰনেট আৰু মোবাইল ডাটা সেৱা স্থগিত কৰিছিল।
