গুৱাহাটী: বৃহস্পতিবাৰে উপৰ অসমত কংগ্ৰেছৰ নিৰ্বাচনী শংখ বাজালে অসম প্ৰদেশ কংগ্ৰেছ কমিটীৰ সভাপতি গৌৰৱ গগৈয়ে। মৰাণৰ তিলৈ গাঁও বজাৰত অনুষ্ঠিত ডিভিজনেল বৈঠকত দলীয় কৰ্মীসকলক সম্বোধন কৰি মুখ্যমন্ত্ৰী হিমন্ত বিশ্ব শৰ্মাৰ বিৰুদ্ধে তীব্ৰ ৰাজনৈতিক আক্ৰমণ আৰম্ভ কৰে গগৈয়ে।

উপৰ অসমৰ কেইবাখনো জিলাৰ কংগ্ৰেছ নেতা আৰু ঘাঁটি পৰ্যায়ৰ কৰ্মীসকলৰ আগত বক্তব্য ৰাখি গগৈয়ে স্পষ্ট কৰি কয় যে কংগ্ৰেছ দলে কোনো তাৰকা প্ৰচাৰকৰ ওপৰত নিৰ্ভৰ নকৰে।

“আমাৰ কৰ্মীসকলেই আমাৰ সৰ্বশ্ৰেষ্ঠ তাৰকা প্ৰচাৰক,” বুলি উল্লেখ কৰি তেওঁ কয় যে ৰাজ্যত কংগ্ৰেছৰ পুনৰুত্থান ঘাঁটি পৰ্যায়ৰ শক্তিৰ ওপৰতেই নিৰ্ভৰ কৰিব। তীব্ৰ ভাষাত মুখ্যমন্ত্ৰীক আক্ৰমণ কৰি গগৈয়ে কয় যে স্বাধীনতা সংগ্ৰামৰ নেতৃত্ব দিয়া কংগ্ৰেছৰ কৰ্মীসকলক অসমৰ ইতিহাসৰ “সবচেয়ে ধূর্ত মুখ্যমন্ত্ৰী”য়ে ভীত কৰিব নোৱাৰে।

“কংগ্ৰেছ-মুক্ত অসম” শ্লোগানক বিজেপিৰ কল্পনামাত্ৰ বুলি আখ্যা দি গগৈয়ে দৃঢ়ভাৱে কয় যে কংগ্ৰেছ পুনৰ ক্ষমতালৈ আহিবই। দলৰ ভিতৰত বৰ্ধিত উৎসাহৰ কথা উল্লেখ কৰি তেওঁ কয় যে শেহতীয়াকৈ ৰাজীৱ ভৱনত টিকট প্ৰাৰ্থীৰ অভূতপূৰ্ব ভিৰ দেখা গৈছে। “এই ভিৰ দেখি সাধাৰণ মানুহো আচৰিত হৈছে। কালি হামৰেণ আৰু আজি মৰাণৰ বৃহৎ সমাৱেশৰ পাছত বিজেপি নেতাসকলে নিশা টোপনি হেৰুৱাইছে,” বুলি মন্তব্য কৰে গগৈয়ে।

গগৈৰ ভাষণৰ কেন্দ্ৰীয় প্ৰশ্ন আছিল — “হিমন্ত বিশ্ব শৰ্মা কোন?”। এই প্ৰশ্নটো প্ৰতিটো গাঁৱলৈ লৈ যাবলৈ তেওঁ কংগ্ৰেছ কৰ্মীসকলক আহ্বান জনায়। মুখ্যমন্ত্ৰীৰ আচৰণ দেখি এতিয়া সাধাৰণ মানুহেও একে প্ৰশ্ন সুধিবলৈ ধৰিছে বুলি তেওঁ কয়।

“এইবাৰ অসমবাসীয়ে স্পষ্ট কৰি দিব যে এইখন কোনো ৰজা-বাদশাহৰ ৰাজ্য নহয়। অসমৰ প্ৰকৃত শাসক হৈছে জনসাধাৰণ,” বুলি গগৈয়ে কয়।

মুখ্যমন্ত্ৰীৰ বিৰুদ্ধে অভিযোগ উত্থাপন কৰি গগৈয়ে কয় যে তৰুণ গগৈৰ নেতৃত্বত ৰাজনীতিত উত্থান লাভ কৰা হিমন্ত বিশ্ব শৰ্মাই তেওঁকেই বিশ্বাসঘাতকতা কৰিলে। ভূমি নীতিৰ ক্ষেত্ৰত চৰকাৰৰ দ্বিচাৰিতাৰ অভিযোগ কৰি তেওঁ কয় যে সৰু মাটিৰ দালালক গ্ৰেপ্তাৰ কৰা হয় যদিও সম্পূৰ্ণ ভূমি ব্যৱসায় এতিয়া মুখ্যমন্ত্ৰীৰ বাসগৃহৰ পৰাই নিয়ন্ত্ৰিত হৈছে।

গগৈয়ে অভিযোগ কৰে যে জনজাতি আৰু খিলঞ্জীয়া লোকসকলৰ সহমতি অবিহনে হাজাৰ হাজাৰ বিঘা ভূমি কৰ্পোৰেট গোষ্ঠীক দিয়া হৈছে। কাৰ্বি আংলং, ৰাভা হাসং আদি অঞ্চলত বিজেপি নেতা আৰু তেওঁলোকৰ সহযোগীয়ে জনজাতীয় ভূমি, পিজিআৰ-ভিজিআৰ ভূমি দখল কৰিছে বুলিও তেওঁ অভিযোগ তোলে। ছয় জনগোষ্ঠীক চলিত বছৰৰ ভিতৰত অপেক্ষামান সুবিধা প্ৰদান কৰাৰ প্ৰতিশ্ৰুতি পালন নোহোৱাৰ কথাকো তেওঁ ৰাজনৈতিক প্ৰৱঞ্চনা বুলি অভিহিত কৰে।

বিজেপিৰ বাংলাদেশী বিৰোধী বক্তব্যক প্ৰত্যুত্তৰ দি গগৈয়ে প্ৰশ্ন তোলে — “বিজেপিৰ ১০ বছৰৰ শাসনত কিমান বাংলাদেশীক দেশান্তৰ কৰা হৈছে?”। তেওঁ কয় যে ইউপিএ শাসনকালত হোৱা দেশান্তৰণৰ তুলনাত বিজেপিৰ সময়ছোৱাত সংখ্যা বহুত কম, যিয়ে প্ৰমাণ কৰে যে বিজেপিৰ ভাষণ আৰু বাস্তৱৰ মাজত কোনো মিল নাই। এনআৰচি, অসম চুক্তি আৰু ধাৰা ৬ কাৰ্যকৰী নকৰাৰ অভিযোগো তেওঁ উত্থাপন কৰে।

অসমৰ অৰ্থনৈতিক অৱস্থা ভয়ংকৰ বুলি মন্তব্য কৰি গগৈয়ে কয় যে ৰাজ্যখনক ঋণৰ বোজাত ডুবাই দিয়া হৈছে। তেওঁৰ মতে, চৰকাৰে প্ৰায় ১.৫ লাখ কোটি টকাৰ ঋণ লৈছে। ইয়াৰ মাচুল সাধাৰণ মানুহে বৃদ্ধি পোৱা মাটিৰ খাজনা, টোল টেক্স আৰু বিদ্যুৎ মাচুলৰ জৰিয়তে ভৰিছে।

ইয়াৰ মাজতে বিদ্যালয় বন্ধ কৰি গাঁও-চহৰত সুৰাৰ দোকান খোলাৰ অভিযোগ কৰি গগৈয়ে কঠোৰ মন্তব্য কৰে — “যদি হিমন্ত বিশ্ব শৰ্মা পুনৰ মুখ্যমন্ত্ৰী হয়, তেন্তে অসমত চৰকাৰী বিদ্যালয় আৰু খালী মাটি নাথাকিব, প্ৰতিটো এলেকাত সুৰাৰ দোকানহে থাকিব।”

মুখ্যমন্ত্ৰীয়ে নিজৰ পৰিয়ালক ধনী কৰি তুলিছে আৰু সমাজৰ দুৰ্বল অংশক আসক্তিৰ দিশে ঠেলি দিছে বুলিও গগৈয়ে অভিযোগ তোলে।

ইফালে, এআইচিচিৰ অসমৰ দায়িত্বপ্ৰাপ্ত সচিব বিকাশ উপাধ্যায়য়ে আগন্তুক নিৰ্বাচনৰ বাবে সংগঠনৰ কৌশল ব্যাখ্যা কৰে। নিৰ্বাচনী পৰ্যবেক্ষক বান্ধু তিৰ্কীয়ে বিজেপিৰ “দুৰ্নীতি আৰু ভয়ৰ ৰাজনীতি”ৰ বিৰুদ্ধে সাহসেৰে যুঁজিবলৈ কৰ্মীসকলক আহ্বান জনায়।

প্ৰাক্তন এপিচিচি সভাপতি ভূপেন বৰাই আগন্তুক নিৰ্বাচনখন নিৰ্ণায়ক যুদ্ধ বুলি উল্লেখ কৰি কয় যে ২০০০ চনৰ আৰম্ভণিতে তৰুণ গগৈৰ নেতৃত্বত যিদৰে কংগ্ৰেছে ৰাজনৈতিক পুনৰুত্থান ঘটাইছিল, এইবাৰো তেনেকুৱাই হ’ব। বিধানসভাৰ বিৰোধী দলৰ নেতা দেবব্ৰত শইকীয়াই কয় যে কংগ্ৰেছ কৰ্মীসকলে কোনো ধৰণৰ ভয়-ভাবুক নকৰিব আৰু বিজেপি মিছা প্ৰতিশ্ৰুতি আৰু ব্যৰ্থ অৰ্থনৈতিক নীতিতেই টিকি আছে।