গুৱাহাটীঃ আগন্তুক নিৰ্বাচনৰ পূৰ্বে ৰাইজকেন্দ্ৰিক ইস্তাহাৰ প্ৰস্তুত কৰাৰ লক্ষ্যৰে অসম প্ৰদেশ কংগ্ৰেছ কমিটিয়ে (APCC) ২০ ডিচেম্বৰ পৰা ৰাজ্যজুৰি এখন বৃহৎ জনসংযোগ যাত্ৰা আৰম্ভ কৰিব। ‘ৰাইজৰ পদূলিত, ৰাইজৰ কংগ্ৰেছ’ শীৰ্ষক এই কাৰ্যসূচীৰ জৰিয়তে অসমবাসীৰ সমস্যা, আকাংক্ষা আৰু ভৱিষ্যৎ চৰকাৰৰ পৰা থকা প্ৰত্যাশাসমূহ সোজাকৈ জানিবলৈ কংগ্ৰেছে উদ্যোগ লৈছে।

এই যাত্ৰাত বিধায়ক, সাংসদ আৰু দলৰ শীৰ্ষ পদাধিকাৰীসকলকে ধৰি বহু জ্যেষ্ঠ কংগ্ৰেছ নেতা অংশ ল’ব। দলীয় সূত্ৰই জানিবলৈ দিয়া মতে, গাঁৱৰ স্তৰত ৰাইজৰ সৈতে পোনপটীয়া সংযোগ স্থাপন কৰি সমাজৰ সকলো শ্ৰেণীৰ মতামত ইস্তাহাৰত অন্তৰ্ভুক্ত কৰাটোৱেই এই অভিযানৰ মুখ্য উদ্দেশ্য।

জনসংযোগ অভিযানৰ অংশ হিচাপে কংগ্ৰেছৰ দলসমূহে কৃষক, শ্ৰমিক, শিক্ষাৰ্থী, মহিলা, সৰু ব্যৱসায়ী, উদ্যোগপতি, বুদ্ধিজীৱী, সামাজিক সংগঠন আৰু সমাজৰ আগশাৰীৰ ব্যক্তিসকলৰ সৈতে মতবিনিময় কৰিব। এই আলোচনাসমূহৰ জৰিয়তে জনঅংশগ্ৰহণৰ ভিত্তিত ‘নতুন অসম’ গঢ়াৰ দৃষ্টিভংগী তৈয়াৰ কৰাৰ লক্ষ্য লৈছে দলটোৱে।

APCC সভাপতি গৌৰৱ গগৈয়ে কয় যে পৰামৰ্শ সংগ্ৰহৰ প্ৰথম পৰ্যায়ত উচ্চ শিক্ষা আৰু মানৱ সম্পদ উন্নয়নৰ ওপৰত বিশেষ গুৰুত্ব দিয়া হ’ব। তেওঁ কয়, কলেজ আৰু বিশ্ববিদ্যালয়ৰ শিক্ষাৰ্থীসকলৰ সৈতে হোৱা মতবিনিময়ত শিক্ষাৰ মান উন্নত কৰা, গৱেষণা আৰু উদ্ভাৱন শক্তিশালী কৰা লগতে শিক্ষাৰ্থীসকলক আত্মনিৰ্ভৰশীল কৰি তোলাৰ প্ৰয়োজনীয়তা স্পষ্ট হৈ উঠিছে। “সৰ্বাধিক প্ৰভাৱিত লোকসকলৰ সৈতে সোজাকৈ কথা পাতিয়েই নীতিগত দিশ নিৰ্ধাৰণ কৰিব বিচাৰিছোঁ,” গগৈয়ে মন্তব্য কৰে।

ৰাজ্যজুৰি সম্পূৰ্ণ কভাৰেজ নিশ্চিত কৰিবলৈ পাঁচটা সমান্তৰাল ক্ষেত্ৰভিত্তিক দল গঠন কৰা হৈছে। এই দলসমূহে উপৰ অসম, মধ্য অসম, বৰাক উপত্যকা, বড়োলেণ্ড, পাহাৰীয়া জিলা আৰু নিম্ন অসমত একে সময়তে অভিযান চলাব। প্ৰতিটো দলে প্ৰতিদিনে এখনকৈ জিলা কভাৰ কৰিব, আনহাতে এটা কেন্দ্ৰীয় সমন্বয় দলে সমগ্ৰ কাৰ্যসূচীৰ তদাৰক আৰু সহায় আগবঢ়াব।

এই ইস্তাহাৰ পৰামৰ্শ প্ৰক্ৰিয়াৰ আনুষ্ঠানিক সূচনা ৬ ডিচেম্বৰত ডিব্ৰুগড়ত কৰা হৈছিল। অধিক সংখ্যক ৰাইজৰ অংশগ্ৰহণ নিশ্চিত কৰিবলৈ APCCয়ে [www.natunaxom.com](http://www.natunaxom.com) নামৰ এটা অনলাইন প্লেটফৰ্মো আৰম্ভ কৰিছে, য’ত নাগৰিকসকলে নিজৰ পৰামৰ্শ প্ৰেৰণ কৰিব পাৰিব। ইয়াৰ উপৰিও, বজাৰ, চাহ বাগিচা এলেকা, চাহ দোকান, বাছ ষ্টপ আদি জনসমাগম হোৱা স্থানত পৰ্যায়ক্রমে ৪ হাজাৰতকৈ অধিক “আকাংক্ষা বাকচ” স্থাপন কৰাৰ পৰিকল্পনা লৈছে দলটোৱে।

ৰাইজক আহ্বান জনাই গগৈয়ে কয় যে এই উদ্যোগত সক্ৰিয় অংশগ্ৰহণৰ জৰিয়তে অসমবাসীয়ে নিজৰ ভৱিষ্যৎ গঢ়াত অংশীদাৰ হ’ব পাৰে। স্থলভিত্তিক জনসংযোগ আৰু ডিজিটেল মাধ্যমৰ সমন্বয়েৰে প্ৰস্তুত কৰা ইস্তাহাৰ যাতে সঁচাকৈয়ে অসমৰ ৰাইজৰ আশা-আকাংক্ষাৰ প্ৰতিফলন ঘটায়, সেয়াই কংগ্ৰেছৰ লক্ষ্য বুলি তেওঁ উল্লেখ কৰে।