জাগীৰোড:
কংগ্ৰেছ নেতা Rahul Gandhi-এ বৃহস্পতিবাৰে অসমৰ বাবে কংগ্ৰেছ দলৰ বিস্তৃত ইশতেহাৰ প্ৰকাশ কৰে। এই ইশতেহাৰত ৰাজ্যৰ আৰ্থিক অৱস্থাৰ ওপৰত এটা White Paper প্ৰকাশ কৰা, Anti-Corruption Commission গঠন কৰা আৰু বিধায়কৰ নিকট আত্মীয়ক চৰকাৰী ঠিকাদাৰী নিদিয়াৰ প্ৰতিশ্ৰুতি দিয়া হৈছে।
ইশতেহাৰত স্বচ্ছ ভূমি নথি, ৰাজহ আৰু কৰ ব্যৱস্থা গঢ়ি তোলাৰ লগতে চাকৰি আৰু চৰকাৰী ঠিকাদাৰীত স্থানীয় লোকক অগ্ৰাধিকাৰ দিয়াৰ কথা উল্লেখ কৰা হৈছে। ইয়াৰ উপৰিও তৎক্ষণাত বান সাহায্য আৰু ভূমিক্ষয় ৰোধৰ ব্যৱস্থা আৰম্ভ কৰাৰ লগতে চিকিৎসালয় আৰু বিদ্যালয়সমূহত খালী থকা পদসমূহ দ্ৰুতভাৱে পূৰণ কৰাৰ প্ৰতিশ্ৰুতি দিয়া হৈছে।
পঞ্চায়তী ৰাজ প্ৰতিষ্ঠানসমূহৰ বাবে নিশ্চিত বাৰ্ষিক অনুদান আৰু জবাবদিহিতা ডেছবোর্ড প্ৰৱৰ্তনৰ কথাও ইশতেহাৰত উল্লেখ আছে। জিলাস্তৰত একক-জানলা নাগৰিক সেৱা কেন্দ্ৰ স্থাপন কৰা, আৰক্ষী সংস্কাৰ আৰু দুৰ্নীতি, ভূমি আৰু মহিলাসংক্রান্ত বিষয়সমূহৰ বাবে দ্ৰুত আদালত স্থাপনৰ প্ৰস্তাৱো দিয়া হৈছে।
ইশতেহাৰত সম্পূৰ্ণ বিকেন্দ্ৰীকৃত আৰু কাৰ্যক্ষমতা-ভিত্তিক শাসন ব্যৱস্থা, ৰাজহুৱা প্ৰতিবেদন ব্যৱস্থা আৰু সকলো সেৱাৰ বাবে এক সংহত ডিজিটেল শাসন ব্যৱস্থা গঢ়ি তোলাৰ লক্ষ্য উল্লেখ কৰা হৈছে। লগতে সৰ্বজনীন স্বাস্থ্যসেৱা, ১০০% বিদ্যালয়ভৰ্তি নিশ্চিত কৰা, বান আৰু ভূমিক্ষয়ৰ প্ৰভাৱ উল্লেখযোগ্যভাৱে হ্ৰাস কৰা, আয় দুগুণ কৰা আৰু স্থায়ী কৰ্মসংস্থান বৃদ্ধিৰ লক্ষ্যও দাঙি ধৰা হৈছে।
ইয়াৰ লগতে “কর্মযোগী উদ্যোগী” উদ্যোগ ঘোষণা কৰা হৈছে, যাৰ জৰিয়তে পুৰুষসকলকো অন্তৰ্ভুক্ত কৰা হ’ব। এই উদ্যোগৰ অধীনত ১,০০০ কোটি টকাৰ “অসম যুৱ উদ্যোগী ভেঞ্চাৰ ফাণ্ড” স্থাপন কৰা হ’ব, যাৰ দ্বাৰা প্ৰথমবাৰৰ উদ্যোগীসকলক সহায় কৰা হ’ব। “উদ্যমী কাৰ্ড”ৰ জৰিয়তে প্ৰথম প্ৰজন্মৰ উদ্যোগীসকলে ৪% সুদত ১০ লাখ টকালৈকে জামিনবিহীন ঋণ লাভ কৰিব।
সৰু ব্যৱসায় আৰম্ভ আৰু পঞ্জীয়ন কৰাৰ বাবে ৭২ ঘণ্টাৰ ভিতৰত সম্পূৰ্ণ হোৱা এক সহজ ডিজিটেল ব্যৱস্থা গঢ়ি তোলা হ’ব। “ডিজিটেল মাৰ্কেট ব্ৰিজ”ৰ জৰিয়তে ক্ষুদ্ৰ উদ্যোগীসকলে বিশ্বব্যাপী ই-কমাৰ্চ প্লাটফৰ্মত নিজৰ পণ্য বিনামূল্যে তালিকাভুক্ত কৰি কোনো কমিছন নোহোৱাকৈ বিক্ৰী কৰিব পাৰিব।
কৰ্মচাৰীসকলৰ বাবে উন্নত আবাস, স্বাস্থ্যসেৱা আৰু কল্যাণমূলক সুবিধা প্ৰদান কৰাৰ লগতে সময়মতে পদোন্নতি আৰু স্বচ্ছ বদলি নীতি নিশ্চিত কৰি কৰ্মচাৰী অধিকাৰ সুৰক্ষিত কৰা হ’ব।
