গুৱাহাটী: সদ্য কংগ্ৰেছত যোগদান কৰা এজন নেতাৰ বিতৰ্কিত মন্তব্যক লৈ ৰাজ্যিক ৰাজনীতিত তীব্ৰ প্ৰতিক্ৰিয়া সৃষ্টি হৈছে। এই মন্তব্যক “অনুপযুক্ত আৰু দলৰ ভাবমূৰ্তিৰ বাবে ক্ষতিকাৰক” বুলি আখ্যা দি অসম বিধানসভাৰ বিৰোধী দলনেতা দেবব্ৰত শইকীয়াই কঠোৰ সমালোচনা কৰে।
দেবব্ৰত শইকীয়াই কয় যে এনে ধৰণৰ দায়িত্বহীন মন্তব্যই কংগ্ৰেছ দলৰ নীতি-আদৰ্শ আৰু গণতান্ত্ৰিক মূল্যবোধৰ সৈতে সামঞ্জস্য নাখায়। তেওঁ স্পষ্ট কৰি দিয়ে যে কংগ্ৰেছ এখন শৃঙ্খলাবদ্ধ দল আৰু সকলো নেতাই ৰাজহুৱা বক্তব্য দিয়াৰ সময়ত সংযম আৰু দায়বদ্ধতা পালন কৰিব লাগিব।
তেওঁ লগতে উল্লেখ কৰে যে দলত নতুনকৈ যোগদান কৰা সকলেও কংগ্ৰেছৰ ঐতিহ্য, মূল্যবোধ আৰু সামাজিক সম্প্ৰীতিৰ কথা বুজি লোৱাটো অতি প্ৰয়োজনীয়। এনে মন্তব্যই সমাজত বিভ্ৰান্তি সৃষ্টি কৰাৰ লগতে অযথা বিতৰ্ক উচটাব পাৰে বুলি তেওঁ সকীয়নি দিয়ে।
দেবব্ৰত শইকীয়াই কয়, কংগ্ৰেছ সদায় সংবিধান, ধৰ্মনিৰপেক্ষতা আৰু সকলো শ্ৰেণীৰ লোকৰ ঐক্যৰ পক্ষে অৱস্থান কৰি আহিছে। কোনো ব্যক্তিগত মন্তব্যৰ বাবে দলৰ সামগ্ৰিক অৱস্থান সন্দেহৰ সন্মুখীন হ’ব নোৱাৰে বুলি তেওঁ দৃঢ়ভাৱে প্ৰকাশ কৰে।
এই ঘটনাক লৈ কংগ্ৰেছ দলৰ ভিতৰতো আলোচনা আৰম্ভ হৈছে আৰু নেতৃত্বই বিষয়টো গুৰুত্বসহকাৰে লৈ প্ৰয়োজনীয় ব্যৱস্থা গ্ৰহণ কৰিব বুলি জানিব পৰা গৈছে।
